Kunsi Penusah Nuan enggau Urang Bukai.

Dalam pengidup kita besari2, kitai enda ulih lari ari ‘penusah’. Nama reti ‘penusah’, penusah tu reti iya barang utai ti ngachau pengidup kitai lalu ngenusah ke diri sereta ngeruga runding kitai. Taja amat penusah ti nuntung kitai nya mar amat ka di iyar, tang kitai tau ngelempung ke iya, ngambika enda entu balat pedis diasai. Bakani kitai deka ngelempung ke penusah? Aram kitai meda ari Bup Kudus, randau antara Jetro enggau Moses:

Pemansut 18:18, 21-23 “Enda ulih nuan ngereja pengawa kadiri baka nya, lalu baka nya mega urang mayoh enda ulih nganti nuan…pilih urang ti patut dalam ati nuan lalu tudoh ke sida nyadi tuai orang mayoh: megai tuboh saribu, saratus, lima puloh enggau megai sapuloh iko. Sida enda tau enda orang ti nangi ke Allah Taala, urang ti tau dikarap lalu enda ulih suap. Asoh sida mangku pengawa tetap nyadi pengulu…enti nuan nitih ke ator Allah Taala, nuan tentu enda tebunsa….”

Enti kitai berasai ka diri bisi dituntung penusah, kitai mesti ngiga jalai kena ngelempung ke penusah nya. Reti nya kitai bekunsi penusah kitai enggau urang ti ulih dikarap ke kitai. Tang dulu ari nya kitai besampi minta penemu ari Tuhan. Bisi jaku ribai tu munyi tu, ‘a problem shared is a problem halved’. Kitai enda nemu pemerat tauka pengelempung penusah ti nuntung kitai seagi-agi kitai enda bekunsi lalu nanya penemu urang bukai. Kitai anang malu minta saup, enda ngira kitai nya urang ti besai pangkat tauka nembiak sekula. Kabuah nya mega, Jetro ngajar Moses pasal ‘bebagi ke pengawa’ ngambika enda tekelalu ngenusah ke Moses. Tang lebih ari nya, kitai minta saup ari Allah Taala.

1. Sida ti gawa, tentunya kita bisi penusah ba tempat kerja tauka penusah enggau diri sebilik.

2. Sida ti besekula, tentunya kita bisi penusah ba kaul enggau kaban sekula tauka ba senentang utai ti dipelajar kita.

Kena nutup ke jaku ajar tu, aram kitai meda ba Bup Pengajar 4:9-10, 12.

Orang dua iko badas agi ari siko, laban pengawa saduai tau mujur agi. Enti siko sida terap siko ulih ngangkat ka iya. Tang enti orang siko kediri lalu terap, nya sigi tusah bendar, laban nadai orang ti ulih ngangkat ke iya…tali sabut ti digaga begembar tiga sigi mar ka diputus.

“Datai ngagai aku, semua kita ti lelak

ngema utai berat, lalu aku deka ngasoh kita lantang.”

(Matthew 11:28)