Followers

Friday, December 13, 2013

XMas? Axe-Mas? Ex-Mas? No-Mas? Krismas?

Hari Krismas 2013 udah majak semak. Nyau mansang semak-sesemak. Udah nya, kiruh ga kitai Kristian ngintu Tahun Baru 2014. Bila Krismas datai, bala raban FB mega lalu begau 'be-post' ke pasal Hari Krismas- mai ngabang, nuju pesan, enggau utai bukai meh ti bekait enggau hari Krismas.

Siti utai ti narit ati aku ianya aku tepeda ka sekeda mensia bekelikoh pasal nama singkat 'Christmas'. Utai ti ko aku nya, bisi urang ngena short form 'Xmas' dikena sida nyebut 'Christmas'.

Lalu utai ti deka ditanya aku ba ditu munyi tu:

1). tau ke enda kitai ngena 'Xmas'?
2). Ni chara dilah kitai nyebut nya? 'Axe-mas'? 'No-mas?' 'Ex-mas'?

Enti ka nyaut Tanya munyi tu, kitai mesti ka nemu pasal 'sejarah' enggau huruf 'Greek'.

kala meda symbol di baruh tu?
ya, symbol IKAN (fish)...suah kitai meda bala Kristian ngelekat/nampal/ngantung ba dinding rumah tauka ba kerita.

Simbol ikan, tauka 'Ichthus' dalam jaku Gerika/Greek (fish) endang iya dikena orang Kristian ti keterubah kelia menya. Tanda/symbol tu dikena sida nyadi ka tanda belalai (Secret Christian Symbol). Simbol tu mega diberi nama titah 'sign of the fish' enggau 'Jesus Fish'.

Bah, nama sangkut-paut symbol ikan tu enggau topic kitai saritu ianya 'Xmas: Tau dikena?'.

ICHTHUS tu ke batang iya 'acronym/abbreviation' tauka huruf pandak siti-siti jaku ti panjai. Ngambika banding:

KFC = Kentucky Fried Chicken.
NFC = National Feedlot Corporation
PKFZ = Port Klang Free Zone etc etc etc....

Lalu ICHTHUS/ ΙΧΘΥΣ tu mega bakanya, ukai semina mai reti 'ikan'.

  • Iota (i) ianya huruf ti keterubah ba Iēsous (Ἰησοῦς), [Greek = "Jesus"].
  • Chi (ch) ianya huruf ti keterubah ba Christos (Χριστός), [Greek ="anointed"].
  • Theta (th) ianya huruf ti keterubah ba Theou (Θεου), Greek for "God's", kes genitif ba Θεóς, Theos, [Greek = "God"].
  • Upsilon (y) ianya huruf ti keterubah ba (h)yios (Υἱός), [Greek ="Son"].
  • Sigma (s) ianya huruf ti keterubah ba sōtēr (Σωτήρ), [Greek = "Savior"].
Ngambika mudah agi, ΙΧΘΥΣ tu mai reti
Iēsous (Ἰησοῦς) Christos (Χριστός) Theos (Θεóς) (h)yios (Υἱός) sōtēr (Σωτήρ).

Tu iya, ku ngemudah ke agi:

JESUS KRISTUS ANAK TUHAN PENYELAMAT (Jesus Kristus Anak Tuhan Penebus Mensia).


ok, ok, ok, okkkk...bah nama SANGKUT PAUT ichthus tu enggau 'XMAS' dehh..????!!!

Uji kitai sama berati ke huruf ti ke-2 ba ΙΧΘΥΣ. Bisi meda? Nama nya? X nya? X ke ukai?

Enti kitai macha 'X' nya nitih sebut 'Roman Alphabet' tentu iya 'Ex' meh munyi iya. Tang kitai agi ngetan ka jaku Gerika ba topic tu, lalu 'X' tu ukai iya 'Ex' tang huruf  'Chi', tauka huruf ti keterubah ba Christos (Χριστός).

Nya alai, dalam konteks peragam kitai diatu: X = Christos.

X melambangkan Christ.....

Pengujung, X (Christ) + mas ( (Old English: Crīstesmæsse, meaning "Christ's Mass")

= Christmas...... :)


Nadai patut nyadi isu besai pun enti bisi sekeda ka/enggai ngena 'XMAS' nya. Utai ti patut nyadi isu diatu, mayuh orang Kristian ngintu Hari Krismas enggau chara ti salah. Jesus ti patut dirami utang mensia ti guir-guir ngelu-ngelu ligau-ligau. Besampi awaka Xmas tahun tu mai reti ti besai ba tiap2 iko kitai!

-fr. rock.

Tuesday, October 1, 2013

God, Friends and Mission.

Jaku Ajar ba Pew Bulletin 6 Oktober 2013 (2 Timothy 1:1-14)

Ko Saint Paul, dalam surat iya ti nuju Timothy munyi tu:

“Allah Taala udah ngasoh aku nyadi seruan iya ti nusoi Berita Manah lalu nyadi rasul enggau pengajar orang bansa bukai, lalu kategal nya aku nat ka mayoh pemerinsa. Tang aku mengkang bisi pengarap, laban aku nemu orang ti dikarap ka aku, lalu aku nemu iya ulih ngibun utai ti udah diserah aku ngagai iya nyentok ka Hari Penatai iya. Pegai Jako ti bendar ti udah di ajar aku ngagai nuan, nyadi ka teladan ti dititih ka nuan, lalu mengkang dalam pengarap enggau pengerindu ti endang enggi kitai dalam Jesus Kristus. Ibun utai badas ti udah diberi ngagai nuan, ulih kuasa Roh Kudus, ti diau dalam kitai.”

1).        Sapa St. Paul? Paul tu ukai siko ari 12 Rasul ti keterubah lalu iya endang orang Parisi ari peturun Benjamin (Pilipi 3:5). Taja pan semina sekali aja iya ‘betemu’ enggau Jesus lalu ninga nyawa iya (Surat Kerja Rasul 9), Paul lalu mutus ke ati diri badu agi munoh/merinsa Orang Kristian lalu bejalai ke pengarap merita Injil. Suah mega Paul kena tangkap lalu disimpan ba rumah tutup. Bakani iya tau nyadi ‘rasul’? Iya nyadi Rasul setegal pengawa iya ti chukup badas sereta besai dalam pengawa ngerembai ke Berita Manah. St.Paul mega mayuh nulis Epistola ti dipasuk ka ba dalam Surat Penyanggup Baru.

2.         Sapa Timoti ti nerima surat tu? Timoti tu orang Kristian ti agi biak sereta penulong Paul. Iya datai ari menoa Asia Minor lalu indai iya orang bansa Judah lalu apai iya orang bansa Gerika. Iya nyadi pangan enggau penulong Rasul Paul dalam pengawa ngerembai ka Berita Manah. (Lambar 296 enggau 301, Jaku Pemuka, Penyanggup Baru).

Samoa mensia beguna ka pangan ti ulih nyaup sida ngereja siti-siti pengawa enggau badas. Nya meh kabuah Rasul Paul milih Timoti nyaup iya ngambi ka pengawa saduai ti merita ka Injil olih dikereja enggau manah. Taja pan Rasul Paul suah kena pemarinsa (ayat 12), utang iya semampai meri jaku manah sereta peransang ngagai Timoti. Indah leboh Paul nulis surat tu nuju Timoti, iya benung disimpan ba rumah tutup (jail) di Rome dalam 63 A.D.


Tu meh kabuah kami bala Paderi semampai mai bala mayuh (ngambi ka banding raban PCC) nitih kami bejalai leboh maya House Prayer Group enggau Group Travelling- enggau naka olih, kami meransang semua raban Kristian ngambi bagi diri nyaup sereta betulong leboh kitai ngerembai ke Berita Badas ba menoa kitai Sri Aman tu.

Aku besampi ka Paderi ti ngambi Ministri aku ba St. Luke ila olih gawa enggau bala kita mayuh. God Bless!

Wednesday, August 21, 2013

Pinta Giga Tekong

Tuhan Jesus datai ke dunya tu nyadi pengelepas mensia (John 3:14-17), ngaga kereja ajih sereta nyelai lalu Iya bisi anak murid. Tuhan Jesus mega ngajar jalai mensia patut idup nitih peneka Allah Taala (Matthew 5-6).  lalu iya mega ngajar anak murid iya chara besampi. Ba injil St. Matthew 5:5-14 kitai ulih meda Jesus ngajar pasal jalai/ator besambiang ti ngena ti lalu dikangau kitai ‘Sampi Tuhan Jesus’.

Ba dalam injil saritu mega ianya ba Luke 11:1-13, kitai sekali agi meda Jesus ngajar pasal besambiang, laban bisi anak murid iya minta ajar chara besambiang (sida sigi udah nemu besambiang kadiri, tang sida deka nemu chara ti lebih manah agi nusun jaku sereta leka sembiang). Jesus lalu ngepun sampi Iya enggau leka jaku “Apai, kudus meh nama Nuan”. Besai endar reti leka jaku ba pun sampi tu laban kitai ulih ngangau Allah Taala nya ‘Apai’. Leboh kitai ngadap Tuhan dalam sampi, kitai nadai agi pemalu tauka rawan ati laban kitai nemu Iya Apai ti di Serega lalu kitai diempu Iya.- tentu nya sampi sereta peminta kitai didinga sereta datai ba Iya ti bekuasa.

Leboh kitai besampi, 3 bengkah utai diajar Jesus (Luke 11:9) ianya:

1.         Pinta lalu kita deka diberi: Kitai minta laban kitai beguna lalu enda tebulih ke utai ngena pengering penemu kitai empu aja. Kitai mesti ngaku pengelemi/pengurang diri empu awak ka kitai sedar kitai empu endang nadai lebih ari sapa-sapa lalu beguna bendar ke saup Allah Taala.

2.         Giga lalu kita deka nemu: Kitai ngiga laban kita enda tetemu tauka leboh maya barang enggi kitai lenyau. Nama utai ti selalu digiga kitai ari Allah Taala, ti suah bendar lenyau? Enti kitai ngiga enggau bendar, kitai tentu tetemu ke utai nya enti kitai ngiga lalu disempulang enggau sampi ngagai Tuhan. Utai ti digiga kitai mensia nyengkaum reta, pengerai, kaul enggau utai bukai. Giga enggau manah awak ka kitai rindu sereta puas hati enggau hasil ti digiga kitai nya.

3.         Tekong pintu lalu iya deka dibuka ke kita: Tuju pintu digaga ngambika nagang/nyekat utai pansut tauka tama sengapa. Enti pintu nya bekunci rat, berega meh utai ti disimpan ba endor nya. Semina iya ti bempu rumah aja bisi kuasa muka/nambit pintu nitih peneka ati iya. Ba ditu, Jesus nyemetak madah ‘pintu nya deka dibuka’ enti pintu ti ditekong nya pintu ti nuju ngagai endor Allah Taala lalu Allah Taala meh endor ti patut dulu dituju kitai sema bisi utai ti amat-amat digiga sereta dipinta kitai.

Menyadi Dalam Kristus, ba pun jaku ajar aku tadi aku bisi nyebut umur sida ti ba dalam kategori orang biak ba gerija tu entara 12 nyentuka 35 tahun. Lalu kita mega tentu nemu, umur Tuhan Jesus leboh iya belaboh ngereja pengawa iya….umur iya 30 tahun. Uji kitai sama meda ba injil St. Luke 3:23.

“Leboh Jesus belaboh ngereja pengawa iya, umur iya kira tiga puluh taun”.

Ba umur ti biak, Tuhan Jesus udah ngayan ka diri empu ngagai bala mayuh lalu ngereja pengawa ti manah. Ba umur ti biak mega, Jesus udah bejalai lalu nusi berita badas pasal perintah Allah Taala lalu iya bisi anak murid ti nitih iya ngereja pengawa lalu nampung pengawa iya. Kitai mega tentu ingat ba injil St. Luke 2:41-52 “leboh iya beumur 12 tahun, Jesus duduk begulai enggau bala pengajar orang Judah mending ke ajar sida sereta nanya ka mayoh macham utai ari sida”. St. Luke 2:52 madah munyi tu:
“Jesus nyau mansang besai, ukai semina ba tuboh tang mega mansang dalam penemu. Iya dikerindu ka Allah Taala enggau mensia”.

            Ari penerang leka jaku nya tadi, kitai patut nemu ianya Jesus mega baka kitai semua nengah proses tauka mansang dalam pengarap belubah-lubah berengkah ari iya agi mit nyentuka umur iya 30 tahun. Pulai baru ngagai injil minggu tu, sida anak murid Tuhan Jesus minta ajar chara besambiang ari iya ukai semina kategal iya ti pengajar, tang laban sida nemu Jesus tu semak endar enggau Allah Taala dalam sampi sereta penemu iya ti ba senentang pengarap. Sida arap ke Jesus laban sida nemu iya semak enggau Allah Taala kenyau iya agi mit. Tu patut nyadi ka peransang ngagai kitai semua telebih agi nuju kita ti agi biak. Tumu agi kitai ngelala Tuhan, manah agi. Lama agi kitai ngelala Tuhan, kering agi pengarap kitai ba iya. Munyi ti diajar St. Paul ngagai Timothy ba 1 Timothy 4:12 “Anang neju ka orang ngemaroh ka nuan laban nuan agi biak, tang nyadi ke teladan sida ti arap, dalam jako nuan, pendiau nuan, pengerindu nuan, pengarap enggau penuchi nuan”.

Tuesday, May 14, 2013

Acts 2:1-21 (Pentecost Sunday) 19 May 2013


JAKU AJAR BA PEW BULLETIN (19 MAY 2013)

Acts 2:1-21 (Pentecost Sunday)

Dalam kalendar Gerija kitai saritu kitai ngintu ‘Hari Pentikos’ lalu tu meh hari kitai ngingat ke utai ti nyadi ba bala sida ti arap (Kerja Rasul 2:1-4) ti nerima Penatai Roh Kudus maya sida begempuru ba endor siti. Hari Pentikos diintu 50 hari sepengudah kitai ngintu Hari Ista. Hari Pentikos tu mega dikangau kitai ‘Hari Pengada Gerija’ (the Birth of The Church). Ditulis ba dalam Surat Kereja Rasul munyi tu:

1). Utai ti didinga sida: “Datai ngenyit munyi utai ari langit ti baka munyi ribut puting beliong lalu bepangka ngisi samoa rumah ti endor sida dudok nya” (ayat 2).

2). Utai ti dipeda sida: “Udah nya sida meda utai ti baka daun api ti nyerarai lalu inggap ba genap iko sida dalam rumah nya.” (ayat 3).

3).  Utai ti nyadi ba sida: “Samoa sida bela diisi Roh Kudus magang, lalu sida belaboh bejaku ngena mayoh macham jako bansa bukai, laban Roh Kudus nya udah ngasoh sida bejako”. (ayat 4).

Menyadi dalam Kristus, semua tu nyadi ba sida ti arap laban Jesus ti dulu bejaku besemaya enggau sida sebedau Iya diregang munyi ba dalam Injil kitai minggu tu (John 14:15-abis): “Aku deka minta ari Apai, lalu iya deka meri ke kita Penyaup siko, Roh Pemendar, meruan ba kita belama”. Tu meh kabuh samoa semaya Jesus olih dipechaya ke kitai orang Kristian laban Roh Kudus ti disemaya Iya udah amat datai lalu nya meh pun penumboh Gerija ti lalu terus meri pengidup ukai semina ngagai raban Kristian tang mega nyaup semua pengawa ti dikereja kena ngerembai ke Eklisia (Gerija) Allah Taala.

Penudi iya, Roh Kudus diau ba dalam kitai (1 Korint 3:16) lalu sebaka enggau bala sida Rasul ti udah ninga, meda sereta ngasai ke Roh Kudus nya datai maya Hari Pentikos, kitai mega tentu iya deka ngasai ke semua nya amat-amat nyadi ba pengidup kitai siko-siko. Munyi ko St. Paul ti bekenang pasal pengawa Roh Kudus ba dalam kitai: “Tu reti utai ti ko aku: awak ka Roh Kudus ngator pendiau kita, lalu anang nitih ka gaya pengidup mensia ti bedosa ari asal”. (Galatia 5:16). 

Saturday, April 27, 2013

GAMBAR HANTU YANG 'ORIGINAL' LAH SANGAT.....

Siti utai ti ka ditanya aku, sapa editor report tu? Tu zaman 'semua orang nemu'. Ka ke bakani meh laporan kitai, nama bisi FLAW tauka silap ripot (telebih agi enti bisi gambar ti tengala ngenyinda pelesu), tentu nya tadi ngayan ke pengelemi diri empu. Aku ngarap ke dudi ila anang entu terdesak ka ngulih ka jerita sensasi nyintuka sanggup ngena application ari Android 360.




GAMBAR HANTU PALSU DI HENFON



LAGI GAMBAR HANTU PALSU (CONTOH)

WAH GAMBAR 'HANTU' DI RUANG  TAMU LAH PULAK

Di bawah ialah LINK kepada cerita lain pasal hantu henfon:



Siti utai ti ka ditanya aku, sapa editor report tu? Tu zaman 'semua orang nemu'. Ka ke bakani meh laporan kitai, nama bisi FLAW tauka silap ripot (telebih agi enti bisi gambar ti tengala ngenyinda pelesu), tentu nya tadi ngayan ke pengelemi diri empu. Aku ngarap ke dudi ila anang entu terdesak ka ngulih ka jerita sensasi nyintuka sanggup ngena application ari Android 360.

Sekian, aleichem Shallom!


Thursday, February 28, 2013

Jaku ajar ba Pew Bulletin (03.03.2013)


Jaku ajar ba Pew Bulletin (03.03.2013)

Tabi menyadi dalam Kristus, sereta selamat Hari Minggu. Saritu kitai udah tama ke dalam Minggu ti ke-3 dalam Musim Lent ti alai kitai ngintu musim tu enggau jimat sereta ngintu diri sepenaka ulih nitih ke ator/disiplin Gerija.

Injil ke pagi tu (Luke 13:1-9) bejaku pasal Jesus ti nyaut tanya orang mayuh pasal ‘dosa’. Semua kitai bela nemu dosa tu meh ti ngasuh mensia jauh ari mulia Allah Taala. Mensia bedosa leboh maya sida alah ulih penguji dunya lalu upah dosa tu pemati belama-lama (Rome 6:23). Nya alai dalam ajar Jesus (ayat 3) iya ngajar bala mayuh “Aku madah ke kita, enti kita enda ngesal ati ke dosa diri, kita deka mati magang baka sida nya”. Ari jaku Jesus nya kitai ulih meda ‘peluang diberi Allah Taala’ setegal leka jaku ‘enti kita enda ngesal ati’. Reti nya tadi ‘enti  sida ngesal ati ke dosa’ dia baru dosa sida diampun.

Jaku sempama ba dalam injil tu mega (ayat 6-9) ngajar lebih dalam agi pasal ‘peluang ti diberi Allah Taala’ munyi ko jaku aku ti dulu tadi. Jaku sempama nya bejaku pasal kayu ara ti rumbau (enda bebuah taja udah idup 3 tahun) nya alai orang ti bempu kebun anggor nya ringat meda kayu nya tumbuh ngapa ba kebun anggor iya (kayu ara nya ditanam numpang ba kebun anggor) lalu merintah orang ti nyaga kebun iya nebang kayu ara nya. Ba ditu kitai meda tukang kebun nya agi sayau ke kayu ara ti nadai bebuah nya lalu minta timpoh setahun agi alai iya deka ngintu kayu nya enggau manah. Enti sema abis timpoh nya lalu nadai mega kayu nya meri hasil, dia baru iya deka nebang kayu nya (ayat 9).

Semua kitai udah diberi peluang lalu udah ditebus olih darah Jesus leboh kitai ngaku Iya nyadi Juruselamat kitai. Sebaka enggau kayu ara nya, Allah Taala ka meda kitai mansut ke ‘buah’ ti manah ba pengidup kitai- buah Roh Kudus (Galatia 5:22-23). Nadai reti kitai nyadi orang Kristian enti kitai nadai ‘kualiti’ baka ti dipinta Allah Taala. Nya alai Musim Lent tu meh alai kitai belajar sereta ngelala diri empu nitih peneka sereta ator Allah Taala. Amen.


Wednesday, February 27, 2013

Chapel St. Andrew's Sunga (Sri Aman)

Last Sunday i had the opportunity to serve Holy Communion at this small Chapel (24.02.2013) for the 1st time, about 1 hour drive from Bandar Sri Aman. Brought my (friend's) guitar along and so we had some praise songs before and after the service which was led by me. Here are some of the photos taken. I am very sorry that i didnt have the chance to snap the picture of the whole congregation that packed the chapel that morning.

That's me entering the Chapel.

front view.



With the Layreaders after the service.


'The road not taken'

There are other parts of the road which is worse than this, but i didnt take the photo.

i lost a rim cap here

I need a 4wd for this next time

Wednesday, February 13, 2013

Minggu Lent ti ke-1


Saritu kitai udah tama ke dalam Minggu Lent ti keterubah. Musim Lent tu bepun ari Ash Wednesday (Sembiang Abus Hari Tiga),ti alai tanda regang dikelai ba kening kitai ngena abus regang daun ‘Palm Sunday’ ari tahun ti dulu. Abus ti dikelai tu nanda ke pengesal ati ke dosa ti digaga ngelama tu sereta pengidup mensia ti baka abus: enda meruan sereta deka pulai ke abus.

Musim Lent di intu sepengelama 40 hari ti alai kitai ‘bepasa & nagang diri empu’. Mayuh chara kitai bepasa, ukai semina ari pemakai aja utang mega nengah belanja (mata duit) sereta pengingin tuboh ti semampai deka (mejal diri empu) nitih pemansang dunya. Musim Lent tu meh endor kitai belajar ngering ke diri empu ngelaban penguji.

Dalam injil St. Luke 4:1-13, Jesus bepasa ba menoa puang ti alai iya diuji sitan sepengelama 40 hari. (Musim Lent mega di intu sepengelama 40 hari). Taja pan Iya lapar laban nadai makai utai nama-nama sereta ba menua puang, Jesus enda alah olih uji sitan:

1. Sitan ngasoh Jesus nukar batu bebali nyadi roti. (ayat 3).
2. Sitan ngasoh Jesus besugang nyembah iya. (ayat 5-7).
3. Sitan ngasoh Jesus terejun ari legit Rumah Sembiang ti pemadu tinggi (ayat 9).

Jesus enda alah olih penguji ari sitan laban Iya ngering ke diri empu ngena leka Jaku Allah Taala. Semua pujuk sitan nya disaut Jesus enggau betul, nya alai sitan tembu nguji iya (ayat 13). Baca Bup Kudus kita ba rumah (anang nganti Hari Minggu aja), anang enda ngering ke diri empu enggau leka jaku Allah Taala.

Dikena aku nyimpul ke jaku ajar tu, sekali agi aku mai kitai meda pemenang Tuhan Jesus ba atas penguji ari sitan. Jesus nadai bedosa laban iya enda alah diuji sitan. Mensia bela bedosa laban mudah endar alah olih penguji ari sitan. Enti deka menang, titih ajar sereta chara Tuhan Jesus ianya: “Ngering ke diri empu ngena leka Jaku Allah Taala”. Amen.


Wednesday, February 6, 2013

An Appeal For Donation (St. James' Chapel, Sg. Besai)

Chapel St. James' Sungai Besai Asal, Sri Aman.

Selamat Pagi bala menyadi dalam Kristus.

Aku ngari ke bala Komiti Chapel St. James' Sungai Besai deka ngenatai ke jaku minta bantu nambah ke fund dikena kami nangkir sereta ngemanah ke agi chapel kami tu.

Jam ke diatu, dipelaba ka 65% bilik paderi sereta dapur udah tembu, utang kami agi begiga ke belanja kena bebeli ke sinki, kain langsir, cheremin keping ke penjan, sereta perengka bukai ti deka dikena ba chapel.

Ba baruh tu gambar rumah chapel ti benung digaga. Fund chapel agi suntuk RM1500 laban ungkos bebeli ke  barang ngaga rumah udah ngelebus kos asal ianya RM8000.
















Kita ti deka nulong meri donation nambah fund, tau betalipaun ngagai Subdeacon Jiram ti nyadi ke Chairman Chapel tu ba lumor 019-8541043


Nya aja ari aku, Reverend Rodriguez Unak.