Siko lelaki (Kenneth) tama ke dalam kedai komputer lalu berandau enggau indu tuai ti bempu kedai komputer nya lalu ko Kenneth bejaku:
Kenneth: Aunty, amat besai endar kedai nuan tu. Ku ka belajar chara bedagang ari nuan.
Aunty: Udah nya?
Kenneth: Udah nya aku ka muka kedai komputer aku empu.
Aunty: Udah nya?
Kenneth: Udah nya aku ka ngasuh kedai aku nya ila jauh besai agi ari kedai nuan.
Aunty: Udah nya?
Kenneth: Udah nya aku lalu bepemisi, mayuh duit, lalu beridup enggau duit aku nya nyentuk ka aku tuai.
Aunty: Udah nya deh…?
Kenneth: …..udah nya aku……entah???
******************************************************************************
Bisi ‘dunia’ ti jauh manah agi ti udah disemaya Allah Taala, ti manah agi ari dunia alai kitai diau ke saritu. Udah kitai nadai agi ba ditu, kitai deka mansang kin. Udah nya? Udah nya kitai diau belama-lama iya enggau Jesus. Udah nya? Nadai agi utai bukai kelimpah ari pengidup ti meruan, muji Allah Taala belama-lama. Nya dikangau kitai ‘eternity’. Belama-lama iya.
Dalam injil ke pagi tu, Jesus ngena jaku sempama pasal siko lelaki ti kaya ti pandak runding. Ukai kategal iya ti kaya lalu iya salah, tang laban runding iya nya enda ngena ba mata Tuhan. Tuhan endang sigi deka kitai semua mujur dalam pengawa kitai sereta bulih pemisi (nya kabuah iya merekat tiap-tiap iko kitai!).
Jaku sempama Jesus nya tadi muka mata enggau runding kitai ngagai dunia ti ka datai, udah timpoh kitai ba dunia tu tembu. Jesus ngasoh kitai besedia, anang tekelalu rindang/lika enggau utai ti enda meruan.
Urang bansa Rom bisi jaku dalam ti munyi tu: ‘Pengaya tu sebaka enggau ai tasik ti masin; makin mayuh di irup nuan, makin majak nuan aus.’
Bakani kitai ngena semua pemisi sereta pengidup kitai ke saritu? Pulai ka dunia, tauka nya pulai ka perintah Allah Taala ti meruan belama-lama iya? Tau kitai ngumpul pengeraja, sigi utai ti manah, tang udah nya deh?
