Sapa Ti Pemadu Besai? (Mark 9:30-37)

Jesus ngereja pengawa Iya ba mayuh bengkah menoa baka Galili enggau Kapernaum lalu bejalai enggau bala anak murid iya 12 iko. Ba rantu jalai Jesus bisi ninga anak murid Iya bekelikoh pasal ‘sapa ti pemadu besai’. Leboh Jesus nanya, sida enda nyaut Iya. Nya kabuah Jesus lalu dudok lalu ngangau ke sida 12 iko (ayat 34-35). Iya lalu ngajar sida enggau manah munyi tu:

“Barang sapa ti deka nyadi ketuai enda tau enda dudi ari samoa orang,

lalu nyadi pemela samoa orang.”

            Nambah ke jaku ajar nya, Jesus mega lalu ngambi siko anak mit (ti ba rumah nya) lalu ngasoh anak mit nya bediri ba mua sida (ayat 36). Udah nya Jesus lalu ngerendut anembiak mit nya lalu madah “Barang sapa ti nyambut siko anak mit baka tu dalam nama aku, nyambut aku; lalu barang sapa ti nyambut aku ukai semina nyambut aku aja, tang iya mega nyambut iya ti ngasoh aku.” (ayat 37).

            Ari jerita nya tadi kitai berati ke anak murid Tuhan Jesus lebih agi ngemerat ke ‘penudok sida’ enti dibanding enggau pemati ti dikenang ke olih Tuhan Jesus. Sida enda mereti ke jaku ajar Iya lalu enda mega berani betanya ngagai Iya (ayat 32). Penudok sereta kuasa tekelalu balat ngisi runding sida ngujung ke sida bekelikoh enggau pangan diri.

            Jesus ngena siko anak mit dikena ngajar sida laban anak mit tu ‘nadai kuasa sereta nadai deka ngiga nama ke diri empu’. Pemesai Perintah Allah Taala deka ditemu leboh maya kitai ngemerat ke orang bukai dulu agi ari kitai empu laban nya meh batang ajar Jesus- Iya datai ukai minta bela, tang deka mela lalu meri nyawa diri kena nebus orang mayuh (Matthew 20:28).

           

Barang sapa ti nyambut orang bukai enggau chukup basa enggau manah, orang nya sigi dikerindu ke Allah Taala laban iya enda bepilih. Jesus empu madah ‘barang sapa ti nyambut siko anak mit baka tu dalam nama aku, nyambut aku; lalu barang sapa ti nyambut aku, ukai semina nyambut aku aja, tang iya mega nyambut iya ti ngasoh aku” (Mark 9:37)

            Sapa ti pemadu besai? Enti kitai deka bekelikoh pasal sapa ‘ti pemadu besai’ ba rumah, tentunya apai sereta indai kitai meh ti pemadu besai. Pia mega enti ba upis perintah tauka kompeni, orang ti pemadu besai tentunya pengarah tauka ketua jabatan. Pengetua, guru besar enggau pengajar meh ti pemadu besai ba sekula. Leboh kitai meda pengidup kitai empu nengah chara orang Kristian, Tuhan Jesus meh ti pemadu besai. Nya alai, patut kitai ngasi ke jaku Tuhan sereta peneka Iya dalam pengidup kitai siko-siko laban Tuhan meh ti pemadu besai. Amen.