sampi Tuhan Jesus

Jesus: Roti Pengidup

JAKU AJAR BA PEW BULETIN 12/08/2012

John 6:35, 41-51

Ko Jesus madah ngagai sida, “Aku tu roti pengidup. Iya ti datai ngagai aku enda nemu lapar; iya ti arap ke aku enda nemu aus.” (John 6:35).

Roti tu siti ari pemakai kitai mensia lalu meri pengidup (nutrient & zat) ke tuboh kitai mensia. Leboh Jesus ngena leka jaku ‘roti’, nyemetak bendar ba semua orang ti ninga jaku ajar Iya laban ‘roti’ endang sigi diempa sida bansa Judah besari-sari, ngambi ka banding baka orang Malaysia ti sigi ngempa asi ninting ari (staple food). Utai ti patut dipansik kitai ianya leboh Jesus nyema ke diri empu ‘aku tu roti pengidup’, jaku roti tu tadi ukai semina nyadi ke barang pemakai pulai ke pengering tuboh tang diatu udah mai reti ti baru. – Jesus nya jalai nuju pengidup ti meruan.

Leka jaku Pengidup dalam jaku ajar Jesus olih dibagi dua:

1). Pengidup dalam Roh: “Allah Taala nya Roh enggau pemendar, lalu sida ti nyembah iya enda tau enda nyembah dalam kuasa Roh Kudus enggau pemendar” (John 4:24). Pengidup ti diajar Jesus nya mai kitai mayuh ngelala Allah Apai enggau ‘peribadi’olih saup Roh Allah Taala ti diau dalam tiap iko kitai (1 Korint 3:16).

3). Pengidup ti meruan sereta belipat- lipat (sereta diberkat): “Aku datai awak ka sida tau bulih pengidup ti meruan, pengidup ti chukup belipat-lipat” (John 10:10b). Nangkan ke nya, Jesus mega besemaya “dalam rumah Apai aku mayoh bilik endor diau, lalu aku deka nyendia ke endor alai kita. Aku enda nusoi ke kita ngapa, enti utai nya enda nyadi baka nya” (John 14:2).

            Dikena aku nyimpul ke jaku ajar tu aku mai kitai semua berunding baru ke leka jaku Tuhan Jesus ti madah ‘ aku tu roti pengidup’, mai nya tama ke dalam pengidup kitai mayuh laban semina enggau chara nitih sereta arap ke Jesus, dia  kitai mensia tau bulih pengidup ti bendar sereta meruan belama-lama iya. Amen.

REVEREND RODRIGUEZ UNAK

Mark 4:35-41 “Jesus Ngasoh Kabut Teduh”

Jaku Ajar kena Hari Minggu 24 June 2012 (Pew Bulletin)

Mark 4:35-41 “Jesus Ngasoh Kabut Teduh”

Tuhan ngayan ke kuasa iya nengah mayuh macham chara.

• -          Iya ti ngaga semua utai
• -          Iya ti meri pengidup
• -          Iya ti nyelamat
• -          Iya ti nyuman/ meri pengerai

Injil ke saritu bejaku ke pasal Tuhan Jesus ti ngasoh kabut tedoh. Lemai hari nya, Jesus mai sida anak murid iya ngelayang ke seberai tasik Galili ti alai iya ninggal ke orang mayuh ti diajar iya (injil St. Mark bagi 3). Jesus sigi iya tebilang enggau jaku ajar iya ti nyelai ari ajar sida pengajar bukai ba jeman nya, laban iya ngajar ngena jaku sempama ti mai reti ti besai sereta ngasoh orang mayuh berunding enggau dalam. Jesus ngayan ke kuasa Allah Taala nengah jaku ajar iya.

Leboh Jesus ngasoh kabut tedoh, dia iya mega ngayan ke kuasa enggau pengeraja iya empu ngagai anak murid iya. Ba orang bansa Judah, tasik tu meh ‘alai semua antu sereta kuasa ti jai diau’. Nya meh kabuah sida anak murid Jesus takut (ayat 38) lalu enti kitai meda jerita Jesus bejalai ba atas ai (Matthew 14:26) sida anak murid iya ngerara ‘antu nya!’. Nadai runding bukai agi semina ‘antu, pemati & pengerusak’ aja ti datai ba sida leboh maya sida ba atas tasik.

Jesus lalu ngasoh ribut nya tedoh. Gelumbang nadai agi mangka (ayat 39), kabut lalu badu, tasik lalu tedoh. Meda utai nya nyadi, tentu nya ba runding sida anak murid Jesus munyi tu:

Jesus endang bekuasa, ukai semina ulih ngasoh kabut tedoh utang mega iya bekuasa atas bala antu, penusah enggau pemati.

Menyadi dalam Kristus, sebaka enggau anak murid Jesus kitai mega mesti mai Jesus ‘tama ke dalam perau kitai’. Reti nya, mai Jesus ke dalam pengidup kitai besari-sari. Taja gelumbang pengidup mangka tang enti Jesus bisi enggau kitai, kitai nadai pengirau laban Jesus ulih mai kitai pansut ari semua kabut pengidup kitai. Amen.