Pengerai ba Tuboh enggau Roh

Jaku ajar ba St. Lawrence’s Sabu, 9 September 2012

(Mark 7:24- end)

“Pengarap indu siko sereta Jesus nyuman ka orang ti bengal enggau ti bisu.”

------------------------------------------------------------------------------------------

Selamat pagi bala menyadi dalam Kristus, sereta selamat datai besambiang ba St. Lawrence’s Sabu baka ke pagi tu. Saritu kitai udah tama ke minggu Trinity ti ke 14 dalam Kalendar Grija kitai, lalu sebedau aku terus enggau jaku ajar ke pagi tu aku deka dulu mai kitai semua besampi. Besampi kitai.

Menyadi dalam Kristus, dalam injil ti udah didinga kitai nya tadi dia kitai meda pengawa Tuhan Jesus ti muru antu ari tubuh siko anak indu (ayat 29-30) sereta Jesus ti nyuman ke siko orang ti bengal sereta bisu. Jesus ngengkah ke jari iya datas orang nya, ngachok ke tunjok iya ke dalam pending orang  nya sereta ngeludah lalu negu dilah orang nya.

‘Tebuka meh!’ ko Jesus, kemaya nya orang nya lalu olih ninga sereta bejaku. Gerai 100% on the spot. Kitai olih meda semua tu nyadi ba ayat 32-35.

Menyadi dalam Kristus, ari dua iti jerita pasal Jesus ti muru antu sereta nyuman ke orang ti bengal sereta bisu nya tadi kitai tentu iya alit ati enggau kuasa sereta chara Tuhan Jesus bekerja. Mayuh orang arap ke Jesus laban sida meda kuasa iya, mayuh orang nyadi Kristian laban sida udah ngasai ke kuasa iya dalam pengidup sida. Aku enggau nuan nitih ke Jesus laban arap ke Iya ti udah mati datas kayu regang, laban nimbang dosa kitai sebuat.

Injil ke pagi tu nusi pasal ‘pengerai tuboh’ tauka ‘the physical healing’ olih Tuhan Jesus. Leboh kitai ngaku diri empu nya orang Kristian, kitai mesti meda diri empu ukai semina ari sudut tuboh kitai aja (fizikal) tang mega ari segi rohani kitai (our spiritual life as Christians). Nya alai enti orang Kristian nya beguna ke pengerai ba tuboh, tentu mega iya beguna amat ke pengerai ba roh iya. Tu ti dikangau ke kitai ‘spiritual healing’. (baca ari James 5:14-17). Mayuh orang Kristian beguna pengerai ba semengat sida laban penyakit ba semengat tu ukai ba penyakit ba tuboh. Pemedis ba tuboh tu ambi seleka dua Panadol tau kebah tau gerai, tang penyakit ba roh tauka semengat tu beguna amat ke sampi bala mayuh sereta diisi penuh enggau leka jaku Tuhan. Bup Kudus- bible tu meh penuh enggau jaku Tuhan ti ngerai ke semengat kitai ti sakit.

Dalam pejalai, dalam singkang kitai besari-sari ti nyadi orang Kristian kitai tentu iya beguna ke pengerai ba pengidup kitai. Bacha ari Injil St. Mark tu tadi semina siti tauka dua iti aja jerita pasal Tuhan Jesus ti amat-amat olih ngerai ke kitai mensia, meri penyuman ke orang ti arap. Enti nuan sakit, tentu nya nuan nganjung diri empu ke klinik tauka ke sepital. Enti ngasai ke diri empu beguna ke pengerai ba tuboh enggau samengat nuan, kangau 2-3 iko kaban Kristian bai sama besampi ke nuan. Agi mayuh bala Kristian ti sakit ba senentang pengidup roh sida, nya kabuah agi bisi orang Kristian ti bedendam, ringat ke orang bukai sereta kepapas ba ati. Tu beguna ke sembiang semua penyakit ba roh  tu tadi, ubat ari Klinik Dr. Guang enda olih muai penyakit ba roh kitai. Semina sampi aja olih mai pengerai ti mutlak, ti amat ba pengidup orang Kristian.

Bala menyadi dalam Kristus, Jesus datai ukai semina laban deka nebus kitai mensia ari dosa. Jesus mega datai ngambika pengidup tuboh sereta pengidup roh kitai semampai gerai semampai manah belama. Dikena aku nembu ke jaku ajar aku ke pagi tu, aku mai kitai meda injil Matthew 11:28 ti munyi tu:

“Datai ngagai Aku semua kita ti lelak ngema utai berat, lalu aku deka ngasoh kita lantang. Pegai tangkun aku lalu simpan ba ati kita, lalu pelajar ke ari aku laban aku nelap sereta baroh ati lalu ati kita deka bulih pengelantang. Tangkun ti diberi aku ngagai kita mudah, lalu ma ti deka diasoh aku bai kita lempong”.

Dalam nama Allah Apai, Allah Anak enggau Allah Roh Kudus. Amen. +

sampi Tuhan Jesus

Jesus: Roti Pengidup

JAKU AJAR BA PEW BULETIN 12/08/2012

John 6:35, 41-51

Ko Jesus madah ngagai sida, “Aku tu roti pengidup. Iya ti datai ngagai aku enda nemu lapar; iya ti arap ke aku enda nemu aus.” (John 6:35).

Roti tu siti ari pemakai kitai mensia lalu meri pengidup (nutrient & zat) ke tuboh kitai mensia. Leboh Jesus ngena leka jaku ‘roti’, nyemetak bendar ba semua orang ti ninga jaku ajar Iya laban ‘roti’ endang sigi diempa sida bansa Judah besari-sari, ngambi ka banding baka orang Malaysia ti sigi ngempa asi ninting ari (staple food). Utai ti patut dipansik kitai ianya leboh Jesus nyema ke diri empu ‘aku tu roti pengidup’, jaku roti tu tadi ukai semina nyadi ke barang pemakai pulai ke pengering tuboh tang diatu udah mai reti ti baru. – Jesus nya jalai nuju pengidup ti meruan.

Leka jaku Pengidup dalam jaku ajar Jesus olih dibagi dua:

1). Pengidup dalam Roh: “Allah Taala nya Roh enggau pemendar, lalu sida ti nyembah iya enda tau enda nyembah dalam kuasa Roh Kudus enggau pemendar” (John 4:24). Pengidup ti diajar Jesus nya mai kitai mayuh ngelala Allah Apai enggau ‘peribadi’olih saup Roh Allah Taala ti diau dalam tiap iko kitai (1 Korint 3:16).

3). Pengidup ti meruan sereta belipat- lipat (sereta diberkat): “Aku datai awak ka sida tau bulih pengidup ti meruan, pengidup ti chukup belipat-lipat” (John 10:10b). Nangkan ke nya, Jesus mega besemaya “dalam rumah Apai aku mayoh bilik endor diau, lalu aku deka nyendia ke endor alai kita. Aku enda nusoi ke kita ngapa, enti utai nya enda nyadi baka nya” (John 14:2).

            Dikena aku nyimpul ke jaku ajar tu aku mai kitai semua berunding baru ke leka jaku Tuhan Jesus ti madah ‘ aku tu roti pengidup’, mai nya tama ke dalam pengidup kitai mayuh laban semina enggau chara nitih sereta arap ke Jesus, dia  kitai mensia tau bulih pengidup ti bendar sereta meruan belama-lama iya. Amen.

REVEREND RODRIGUEZ UNAK