Followers

Tuesday, March 23, 2010


Penatai Raja ti Nepan Keledai(Matthew 21:1-11)

Sebaka enggau jaku ajar dlm Pew Bulletin minggu nyin kemari, jaku ajar aku besangkut-paut enggau Palm Sunday ti diintu kitai baka ke saritu lalu aku deka nerang ka reti iya dalam pengidup kitai siko-siko.


Dalam Matthew 21:1-11, kitai meda Jesus tama ke dalam menua Jerusalem nepan keledai. 520 tahun sebedau Jesus ada, pengawa Jesus ti nepan keledai nya endang sigi udah dipadah ke nabi Sekariah dlm bup iya (Sekariah 9:9-10) ti madah ke siko ‘Rajah deka datai mansang ngagai Jerusalem, ngemaroh ka diri nepan keledai’. Nya kabuah bila utai nya nyata nyadi ba mua mata urang Israel, sida balat begau lalu teringat ke bup nabi Sekariah sereta arap ke siko ‘pengelepas’ ti udah disemaya ke Allah Taala ngelepas ke menoa sida ari dipegai perintah Rome. Penatai Jesus udah ngamat ke jaku nabi Sekariah (Sekariah 9:9-10 & Matthew 21:4-5)


Bisi dua bagi kumpulan mensia kemaia nya, ti bebagi penemu:-


a.) Sida ti nemu pasal bup Sekariah ti nusi pasal penatai Jesus ti nepan keledai; lalu kedua


b.) Sida ti nemu Jesus deka datai lalu ngarap ke Iya nepan kuda perang. Tentu ati sida nya tadi teperasa lalu nadai agi pengadang ati lebuh sida meda pengelepas ti dikarap ke sida nya semina nepan keledai lalu nadai mai beribu-ribu soldadu tang dua belas iko pengikut aja.

Penatai Jesus endang sigi dianti-anti bala mayuh, tang enda semua urang nya bisi runding sereta pengadang ati ti sama (different level of expectation). Sekeda nya puas hati laban amat munyi ko nabi Sekariah, rajah udah datai nepan keledai, tang sekeda urang enda ulih nerima ‘cara rajah sida datai’ lalu berunding “tu ukai pengelepas ti disemaia Tuhan.” Nya meh cara Jesus tama ngagai menua Jerusalem; enggau pemadu pemaroh ati tang cara pemadu nyelai.


Menyadi dalam Kristus, Jesus ti pengelepas kitai mensia sentiasa bisi cara iya empu ti nyelai alai iya tama ke dalam pengidup kitai. Siti ari tanda kitai udah nerima Jesus tama ke dalam pengidup kitai iya nya kitai ‘lempong jari dalam pengawa gerija sereta gerah jari meri ngagai gerija’. Jesus ti pengelepas kitai semampai bisi cara ti nyelai kena ngenatai ke pengingat (memorable) ngambika tiap iko kitai ti betemu enggau Iya dalam pengawa kitai besari-sari berasai semak enggau iya. Dalam injil nya tadi, amat urang ba kota Jerusalem udah meda Jesus enggau semak enggau mata sida empu tang enda semua ngaku Jesus tu meh Pengelepas ti udah disemaia ke Allah Taala.


Tuhan Jesus ti pengelepas aku, Nuan endang manah,

Tama ngagai Jerusalem, enda Nuan nepan kuda ti besai tang siko keledai;

Enti ukai kategal Nuan, aku agi mensia ti bedosa ti kamah,

Tama meh dalam pengidup aku, Nuan ti pemadu mulia Nuan ti pemadu besai.